Liefie, vat my fliek toe
en verander halfpad van plan
(jy weet ek sou in elkgeval nie kon konsentreer nie)
dan stick jy my vir 'n R3 roomys by Steers
Liefie, vat my Pick 'n Pay toe
om jou te help inkopies doen
(jy weet nogsteeds nie watter Stasoft die lekkerste ruik nie)
dan stap jy langs my terwyl ek die trollie stoot.
Liefie, vat my Engen toe
vir 'n laatnag, peperduur pastei
(jy weet ek eet nie pies nie)
dan koop jy vir my 'n muffin.
Liefie, vat my Cuppachino's toe
vir koffie of milo of tee
(jy weet ek wil die rekening betaal)
dan laat jy my toe om dit te doen.
Liefie, vat my hand
en hou my hart net vas
(jy weet ek kan nie sonder jou nie)
dan sê jy net jy's lief vir my.
No comments:
Post a Comment